Өнөөдрийн хурлаар Төрийн дээд шагнал, цол, одон медалиар шагнуулахаар үндсэн байгууллага хамт олон, хорооноос тодорхойлогдож ирсэн 87 иргэний материалыг ИТХ-ын Ажлын албаны Удирдлага, зохион байгуулалтын хэлтсийн дарга Ж.Ганбат Тэргүүлэгчдэд танилцуулж, Нийслэлийн Иргэдийн Төлөөлөгчдийн Хурлын Тэргүүлэгчдэд уламжлахаар болов. Мөн дүүргийн Иргэдийн Төлөөлөгчдийн Хурлын дээд шагнал “Чандмань одон”-гоор 24 иргэнийг, “Хүндэт өргөмжлөл”-өөр 8 иргэнийг шагнаж урамшуулах тогтоол батлагдлаа.
Мөн үеэр Бүгд Найрамдах Турк Улсын Анкара хотын Синжан дүүрэг, БНХАУ-ын ӨМӨЗО-ны Ордос хот, Япон Улсын Нийгата мужийн Госен хотод албан томилолтоор ажилласан багийн ахлагчид Тэргүүлэгчдэд тайлан мэдээлэлээ танилцуулсан юм. Албан томилолтын хүрээнд байгуулсан санамж бичиг болон цаашдын хамтын ажиллагааны талаар дүүргийн Засаг даргад хурлын тэмдэглэлээр чиглэл хүргүүлэхээр шийдвэрлэлээ.
Засаг даргын Тамгын газрын Хүнс, худалдаа үйлчилгээний хэлтсийн дарга Д.Булган 2018 оныг “Өрхийн хөгжлийг дэмжих жил” болгон зарласантай холбогдуулан дүүргийн нутаг дэвсгэрт зуны түр худалдаа эрхлэх газрын байршил, үйл ажиллагааны чиглэлийн төслийг дүүргийн ИТХ-ын Тэргүүлэгчдэд танилцуулав.
