Зөвлөгөөнд дүүргийн Иргэдийн Төлөөлөгчдийн Хурлын дарга бөгөөд ГХУСАЗСЗ-ийн дарга Д.Бат-Эрдэнэ, дүүрэг дэх Цагдаагийн 2 дугаар хэлтсийн дарга Ц.Сугаржав, дүүрэг дэх Цагдаагийн 1 дүгээр хэлтсийн дарга Ө.Эрдэнэхүү, дүүргийн Гэмт хэргээс урьдчилан сэргийлэх ажлыг зохицуулах салбар зөвлөлийн гишүүд, Нийслэлийн цагдаагийн газар, Цагдаагийн ерөнхий газрын төлөөлөл, дүүргийн нутаг дэвсгэрт үйл ажиллагаа явуулж буй 130 аж ахуйн нэгжийн төлөөлөл оролцлоо.
Дүүргийн Иргэдийн Төлөөлөгчдийн Хурлын дарга бөгөөд ГХУСАЗСЗ-ийн дарга Д.Бат-Эрдэнэ зөвлөгөөнийг нээж, хулгайн гэмт хэргээс урьдчилан сэргийлэх ажилд аж ахуйн нэгж байгууллагуудыг татан оролцуулах, гэмт хэргээс урьдчилан сэргийлэх ажилд дэвшилтэд техник технологийг ашиглахыг уриалах, хулгайн гэмт хэргийн тоог бууруулах, хэргийн илрүүлэлтийг нэмэгдүүлэх, төр, иргэн, аж ахуйн нэгж байгууллагын хамтын уялдаа холбоог сайжруулах зорилгоор өнөөдрийн зөвлөгөөнийг зохион байгуулж байгааг тодотгон хэлсэн юм.
Мөн салбар зөвлөлөөс 2016-2018 онуудад дүүргийн 19 хороодын нутаг дэвсгэрт нийт 640 ширхэг хяналтын камерыг 1.338.830.552 /нэг тэрбум гурван зуун гучин найман сая найман зуун гучин мянга таван зуун тавин хоёр/ төгрөгийн төсвөөр суурилуулж, дүүргийн нутаг дэвсгэрт гэмт хэргээс урьдчилан сэргийлэх, иргэд оршин суугчдын аюулгүй, амар тайван амьдрах орчин нөхцөлийг бүрдүүлж ажиллаж байгаа гэдгийг онцлов.
Зөвлөгөөний үеэр дүүргийн нутаг дэвсгэрт үйлдэгдэх хулгайн гэмт хэргийн гаралтыг бууруулах, урьдчилан сэргийлэх, илрүүлэлтийг нэмэгдүүлэх чиглэлээр холбогдох газрууд илтгэл мэдээлэл танилцуулж, санал бодлоо солилцов. Зөвлөгөөнөөс гарсан дэвшүүлсэн санал санаачлага, хийж хэрэгжүүлэх ажлын чиглэлийг нэгтгэн боловсруулж, хэлэлцүүлгийн үр дүнг зөвлөмж болгон үйл ажиллагаандаа хэрэгжүүлж ажиллахаар боллоо.
