Киргиз улсын нийслэл Бишкек хотод 2013 оны 10-р сарын 22-23-нд “Дэлхийн цоохор ирвэс, түүний амьдрах орчныг хамгаалах хөтөлбөр”-ийг хэлэлцэн батлах олон улсын чуулга уулзалт зохион байгуулагдаж, цоохор ирвэс тархсан 12 улс орон, хандивлагч байгууллагуудын төлөөлөгчид оролцон “Цоохор ирвэс хамгаалах Бишкекийн тунхаглал”-ыг хэлэлцэн баталж, жил бүрийн 10 дугаар сарын 23-ны өдрийг “Дэлхийн цоохор ирвэс хамгаалах өдөр” болгон тэмдэглэж байхаар шийдвэрлэсэн юм.
Манай улсад дэлхийд нэн ховордсон цоохор ирвэсийг таньж мэдэх, байгаль, экологийн ач холбогдлыг нь олон нийтэд ойлгуулж мэдрүүлэх, хайрлан хамгаалах үйл хэргийг уриалах зорилготой “Цоохор ирвэсийн өдөр”-ийг 9 дэх жилдээ уламжлал болгон тэмдэглэж байна.
Энэ өдрийг тохиолдуулан өнөөдөр /2021.10.23/ аймгийн ИТХ, ГХУСАЗСЗ, Дэлхийн байгаль хамгаалах сан хамтран “Цоохор ирвэсийн өдөр”-ийг зохион байгууллаа.
Тус өдөрлөгт Ховд аймгийн Жаргалант, Чандмань, Мөнххайрхан, Дарви, Зэрэг, Мөст, Манхан зэрэг сумдын эко клубын хүүхдүүд багш нарын хамт оролцож, өнгөрсөн жилийн ажлаа дүгнэн, ирвэс, түүний идэш тэжээл бологч амьтдын хамгаалалд анхаарлаа хандуулах, хууль бус агнуураас урьдчилан сэргийлэх хэлэлцүүлгийг зохион байгуулж, холбогдох байгууллагуудын төлөөллүүдтэй харилцан санал солилцож, ирэх жилийн ажлын төлөвлөгөөгөө ярилцлаа.
Мөн Баруун бүс нутагт гарч буй хууль бус агнуурын талаар аймгийн ГХУСАЗСЗ-ийн нарийн бичгийн дарга Г.Бадамсүрэн мэдээлэл хийлээ.
“Ирвэсийн эх нутаг-2021” хүүхдийн наадмыг 2021 оны 10 дугаар сарын 23-ны өдөр Ховд, Увс, Говь-Алтай, Баян-Өлгий аймгууд нэгэн зэрэг зохион байгууллаа.
