Монгол улсын Ерөнхийлөгчийн ивээл дор Монголын хөлбөмбөгийн холбооноос Футзалны 21 аймгийн аварга шалгаруулах 4 дэх удаагийн тэмцээнийг зохион байгуулсан байна.
Энэ удаагийн тэмцээн Баянхонгор аймагт зохиогдож, 19 аймгийн 240 гаруй тамирчид Дээд шат, 1-р шатанд хуваагдан өрсөлдсөн бөгөөд Ховд аймгийн шигшээ баг 1-р шатанд амжилттай өрсөлдөж байр эзлэн, шилжин явах цомын эзэд болж, ирэх жилийн тэмцээнд Дээд шатанд өрсөлдөх эрхээ авсан юм. Мөн 2-р сургуулийн төгсөгч Ц.Бат-Эрдэнэ Шилдэг тоглогчоор, 1-р сургуулийн төгсөгч Н.Бямбадорж шилдэг довтлогчоор тус тус шалгарсан байна.
Энэ үеэр ИТХ-ын дарга, Ховд аймгийн Хөлбөмбөгийн холбооны тэргүүн Г.Пүрэвганди аймаг орон нутгийн зүгээс "СПОРТЫН АВАРГУУД" хөтөлбөрийн хүрээнд багийн спортыг хөгжүүлэх, түгээн дэлгэрүүлэх талаар Ховд аймгийн шигшээ багаа тогтмол дэмжиж, хамтран ажиллана гэдгээ онцоллоо.
Тэгвэл тус тэмцээнд оролцсон Ховд аймгийн шигшээ багийн төлөөлөл аймгийн ИТХ-ын дарга, Ховд аймгийн Хөлбөмбөгийн холбооны тэргүүн Г.Пүрэвгандид алтан цомоо гардуулан өгсөн юм.
