Манай улсад 1937 оноос эхтэй, улс төрийн хилс хэргийн хэлмэгдэлд өртсөн олон мянган хүний гэгээн дурсгалыг хүндэтгэх зорилгоор жил бүрийн 9 дүгээр сарын 10-ны өдрийг “Хэлмэгдэгсдийн дурсгалыг хүндэтгэх өдөр” болгон тэмдэглэхээр УИХ-ын 1996 оны 33 дугаар тогтоол батлагдсан бөгөөд энэ жил улс төрийн хэлмэгдэгсдийг санан дурсах, тэдний гэгээн дурсгалыг хүндэтгэн мөнхжүүлэх 28 дахь өдрийг тэмдэглэн өнгөрүүлж байна.

Өнгөрсөн хугацаанд улс төрийн хилс хэрэгт шийтгэгдсэн 31,604 хүнд холбогдох 10,226 хэргийг цагаатгаж, хэлмэгдэгчдийн гэр бүл, үр хүүхэд, ач зээд нөхөх олговор олгох ажлыг зохион байгуулж ирсэн. Тус ажилд нийтдээ 20,075 иргэнд 110 тэрбум төгрөгийн нөхөх олговрыг олгосон байна. Дүүргийн хэмжээнд 2020 онд 48 иргэнд 2,8 тэрбум төгрөг, 2021 онд 7 иргэнд 320 сая, 2022 онд 13 иргэнд 560 сая, 2023 онд 18 иргэнд 720 сая төгрөгийн нөхөх олговор олгоод байна.

Чингэлтэй дүүргийн Цагаатгах ажлыг удирдан зохион байгуулах салбар комиссын ажлын хүрээнд Чингэлтэй дүүрэгт бүртгэлтэй, хэлмэгдэгчдийн гэр бүл, үр хүүхэд, ач зээ нийт 176 иргэдийгээ өнөөдөр Түвдэнпэлжээлин хийддээ урьж, буян ном хурууллаа.

Мөн салбар комиссоос Хэлмэгдэгсдийнхээ гэгээн дурсгалыг хүндэтгэж, жил бүр гэр бүл, үр хүүхэд, ач зээ нь хүрэлцэн ирж, эргэн дурсан, хүндэтгэж байх боломжийг бүрдүүлэх “Хэлмэгдэгсдийн дурсгалд зориулсан төгөл”-ийг байгуулах бэлтгэл ажлыг хангасан бөгөөд Бүх нийтээр мод тарих өдрөөр хүрэлцэн ирж, мод тарихад хэн бүхэнд нээлттэй байх юм.

ХУРЛЫН АЖЛЫН АЛБА