Нийслэлийн Засаг даргын А/431 дүгээр захирамжийн хүрээнд зохион байгуулагдсан нийслэлийн 2015 оны шилдэг хороо шалгаруулах болзолт уралдааны дүн гарчээ. 2015 оны тавдугаар сарын 1-нээс аравдугаар сарын 1-ний хооронд хоёр үе шаттай болсон энэхүү болзолт уралдаан нь нийслэлийн хороодын Засаг дарга нарын үйл ажиллагааг идэвхжүүлэх, хороодын засаглалын чадавхийг сайжруулах, ажлын шинэ санал санаачилгыг дэмжих, төрийн шйлчилгээг үр дүнтэй бүтээлч, шинэлэг байдлаар зохион байгуулахад үндсэн нэгжийн үйл ажиллагааг идэвхжүүлэх, бодит үр дүнг дээшлүүлэх зорилготой юм.
Нийслэлийн 2015 оны шилдэг хороо шалгаруулах болзолт уралдааны эхний шатыг дүүргүүдийн ЗДТГ есдүгээр сард зохион байгуулсан бөгөөд Сүхбаатар дүүргээс V, VII, IX, XI, XII, XVI, XVII, XIX, XX гэсэн есөн хороо эхний 40-д шалгарсан билээ. Ийнхүү эхний шатанд шалгарсан 40 хорооны материалыг нийслэл хүлээн авч, томилогдсон ажлын хэсгүүд хоёрдугаар шатанд шалгарсан хороодод шалгалт, үнэлгээ хийсэн байна. Ингэхдээ хороодод Засаглалыг сайжруулах буюу төрийн үйлчилгээг боловсронгуй болгоход хэрхэн ажиллав, Амьдрах орчны зураглал, Дээд шатны байгууллагаас хэрэгжүүлж буй аливаа үйл ажиллагаанд оролцсон байдал, Эрүүл аюулгүй байдлын индекс гэсэн шалгуур үзүүлэлтийг тусгаж, дээрх үзүүлэлтийг хамгийн сайн биелүүлсэн хороодыг хувиар эрэмбэлж, шилдэг 20 хороог шалгаруулжээ. Ийнхүү нийслэлийн 2015 оны Шилдэг 20 хорооны шалгаруулалтад дүүргийн V, VII, XII, XIX хороод багтсан бол, шилдэг Ажлын хэсэгтэй дүүргийн эхний байрт Сүхбаатар дүүргийн Ажлын хэсэг шалгарсан ажлын амжилттайгаар нийслэлийнхээ 376 жилийн ойг угтаж байна.
Мөн шилдэг хороо шалгаруулах болзолт уралдааны эхний шатанд хороогоо амжилттай оролцуулсан дүүргийн Иргэдийн Төлөөлөгчдийн Хурлын төлөөлөгч, 11 дүгээр хорооны Засаг дарга Х.Батжаргал болон бусад 4 хорооны Засаг дарга нарыг “Нийслэлийн тэргүүний ажилтан” цол тэмдгээр шагналаа.
