Чингэлтэй дүүргийн 15 дугаар хороонд БНХАУ-ын Энхтайван хөгжлийн сангийн 500 мянган ам.долларын буцалтгүй тусламжаар Хүүхдийн амбулатори байгуулж, ашиглалтад хүлээн аваад байгаа билээ. Тэрхүү амбулаторид шаардлагатай зарим тоног төхөөрөмж буюу 15.4 сая төгрөгийн эд зүйлсийг БНХАУ-ын Өвөр Монголын Өөртөө засах орны Эрээн хотын Ардын Төлөөлөгчдийн Их Хурлын хамт олон дэмжлэг болгож өгсөн юм.
Чингэлтэй дүүргийн хүүхэд, багачуудыг өвчин эмгэгээс сэргийлэх үйлсэд оруулсан хувь нэмрийг нь үнэлж, Энхтайван хөгжлийн сангийн Ерөнхий нарийн бичгийн дарга хатагтай Юү Шиао Шуаныг Чингэлтэй дүүргийн дээд шагнал “Чандмань” одонгоор шагнасан байна.
Уулзалтын үеэр дүүргийн Иргэдийн Төлөөлөгчдийн Хурлын дарга Д.Бат-Эрдэнэ Энхтайван хөгжлийн сангийн Ерөнхий нарийн бичгийн дарга хатагтай Юү Шиао Шуанд “Чандмань” одонг гардуулан өгөв.
