Аймгийн хэмжээнд ерөнхий боловсролын болон их дээд сургууль, коллежийн “Төгсөлтийн баяр”-ын үйл ажиллагааг зохион байгуулахтай холбогдуулан аймгийн Засаг даргын А/142 дугаар захирамж гарлаа. Үүнд:
“Төгсөлтийн баяр”-ын үйл ажиллагааг жил бүрийн 05 дугаар сард зохион байгуулахыг аймгийн Боловсрол, соёлын газар, Их дээд мэргэжлийн сургуулийн консерциумд тус тус үүрэг болгож сургуулийн өмнөх боловсрол болон ерөнхий боловсролын сургуулийн 1, 5, 9 дүгээр ангийн сурагчдын дунд төгсөлтийн баярын арга хэмжээг тэмдэглэхийг хориглосон байна.
Мөн “Төгсөлтийн баяр”-ын үйл ажиллагаатай холбогдуулан нийтийг хамарсан аялал, зугаалга зохион байгуулах, түүнд зориулж мөнгө хураах, бэлэг сэлт өгөх, авах, архи согтууруулах ундаа хэрэглэхгүй байх, гэмт хэрэг, зөрчлөөс урьдчилан сэргийлэх арга хэмжээ авах, хариуцлагатай эргүүлийн хуваарийг гаргаж ажиллахыг сургуулийн захирал нарт үүрэг болгожээ.
